شروط الاستخدام

الأطراف والخدمة

الشروط دي بين ROS (ros.sale) وبين المطعم المشترك وصاحبه. ROS بيقدم للمطعم نظام تشغيل على الإنترنت: الكاشير، شاشة المطبخ، الكابتن، موقع طلب باسم المطعم، التوصيل والطيارين، المخزون والوصفات، التقارير، وإضافات زي Commission Killer لرسايل واتساب.

لو في عقد مكتوب بين ROS والمطعم، العقد هو اللي بيتطبق في أي نقطة مختلفة عن الشروط دي.

الحساب والمستخدمين

صاحب المطعم مسؤول عن حسابات موظفيه وصلاحياتهم، وعن سرية كلمات السر والأرقام السرية، وعن أي عملية بتتعمل من حساب في مطعمه.

لو حصل دخول غير مصرح بيه أو حد اشتبه في كده، المطعم يبلغنا فورا عشان نوقف الحساب ونراجعه.

الاشتراك والدفع

الاشتراك شهري أو سنوي حسب الباقة اللي المطعم اختارها، وسعره حسب عدد الفروع. أول 14 يوم تجربة من غير دفع.

الاشتراك الشهري يتلغي في أي وقت قبل ميعاد التجديد، ومفيش استرداد عن الشهر اللي بدأ. الاشتراك السنوي مدفوع مقدما.

لو الفاتورة ما اتدفعتش بعد ميعادها، بنبعت تنبيه، وبعد فترة سماح صفحة الطلب أونلاين بتقف لحد الدفع. بيانات المطعم بتفضل محفوظة.

رسايل Commission Killer التسويقية بتتخصم من رصيد مدفوع مقدم بالسعر المعلن وقت الإرسال. الرسالة اللي واتساب رفضها بيرجع تمنها للرصيد.

بيانات المطعم وعملائه

بيانات المطعم ملك المطعم: المنيو، والطلبات، والعملاء، والمخزون، والتقارير. ROS بيستخدمها بس عشان يشغّل الخدمة للمطعم، ومش بيبيعها ولا بيشاركها مع مطعم تاني.

المطعم يقدر يصدّر بياناته في أي وقت من الشاشات اللي فيها تصدير، أو يطلب نسخة منا.

بعد إلغاء الاشتراك بنحتفظ بالبيانات 90 يوم عشان لو المطعم رجع، وبعدها بنمسحها، أو قبل كده بطلب مكتوب من صاحب المطعم.

تفاصيل التعامل مع البيانات الشخصية في سياسة الخصوصية.

الاستخدام المسموح

المطعم مسؤول عن صحة الأسعار والأصناف والضرايب في المنيو، وعن التزامه بالقوانين اللي بتنطبق عليه، ومنها الفواتير والإيصالات الإلكترونية لمصلحة الضرايب وحماية البيانات الشخصية.

ممنوع استخدام الخدمة لإرسال رسايل مزعجة أو لأرقام مش من عملاء المطعم، أو أي استخدام يخالف سياسات واتساب. أي عميل يطلب إيقاف الرسايل لازم يتوقف عنه، والنظام بيعمل ده لوحده.

ممنوع محاولة الوصول لبيانات مطعم تاني، أو تعطيل الخدمة، أو إعادة بيعها من غير اتفاق مكتوب.

الخدمة والدعم

بنشتغل عشان الخدمة تكون متاحة طول الوقت، ونبلغ المطاعم مسبقا بأي صيانة مخطط لها. الكاشير بيكمل يبيع ويطبع من غير إنترنت، وبيبعت الطلبات أول ما الاتصال يرجع.

الدعم بيكون في المواعيد المتفق عليها في العقد. الأعطال اللي بتوقف البيع ليها أولوية.

بنطور الخدمة باستمرار، وممكن نغير أو نضيف مزايا. لو ميزة أساسية هتتشال، بنبلغ المطاعم قبلها بوقت كافي.

حدود المسؤولية

ROS مش مسؤول عن خسارة ناتجة عن انقطاع الإنترنت أو الكهربا عند المطعم، أو أعطال أجهزة المطعم والطابعات، أو خدمات أطراف تانية زي واتساب وبوابات الدفع وتطبيقات التوصيل.

في كل الأحوال، أقصى مسؤولية على ROS هي قيمة اشتراك آخر 3 شهور اللي المطعم دفعها.

الإيقاف والإلغاء

المطعم يقدر يلغي اشتراكه في أي وقت. ROS يقدر يوقف حساب بعد تنبيه لو حصلت مخالفة جسيمة للشروط دي، أو فورا لو في استخدام بيضر عملاء أو مطاعم تانية.

تعديل الشروط والقانون

لو عدلنا الشروط دي بنبلغ المطاعم قبل ما التعديل يبدأ، واستمرار استخدام الخدمة بعدها يعتبر موافقة عليه.

الشروط دي خاضعة للقانون المصري، ومحاكم القاهرة هي المختصة بأي نزاع.